Friday, October 9, 2015

ඔය මල් හිනාව



දෙන්න බැරිද 
ඔය මල් හිනාව
සාක්කුවේ දාගෙන
ගෙදර අරන් යන්න

උණුවතුර නාලා

තේ එකක් හෙම බීලා
හෙමීට සාක්කුවෙන් අරන්
අත උඩ තියාගෙන
හුරතල් කරන්න

ජනෙල් පියන් අතරින්

හඳ එළිය වැටෙද්දි
උම්මා එකක් දීලා
කොට්ටෙ පැත්තකින් තියාගෙන
නිදාගන්න

Monday, September 1, 2014

හුස්මක්...


ඇස් පියාගෙන
තදින් හුස්මක්
ගනිමි.
අනන්තය
හමු නොවූ
විශ්වයෙන්
පොදක්
සුසුම්නලයට
ඇදගමි.
බිලියන දහතුනක
ඉතිහාසයක්
පෙනහළුවලට
පුරවමි.
ඒ හුස්මට
තවත් සුසුමක්
මුසුකොට,
පා කර හරිමි.

Wednesday, March 13, 2013

මොකද මෙච්චර ලංවෙලා?















ඈ මගේ
ඇඟේ
වදින නොවදින
දුරින්..
මගේ උණුසුම්
සුසුම්
දැනෙනවා ඇති
ඇගේ
ගෙල මතින්..
"මොකද මෙච්චර ලංවෙලා?"
උත්තර නැති ප්‍රශ්න
වචන නැති උත්තර
"හ්ම්ම්...."
තප්පර දහයක් ගතවුනා
තප්පර විස්සක් ගතවුනා
තප්පර තිහක්...
මොහොතකින් ඇය හැරී
මගේ පැත්තට නැවී
විසල් තරු නෙත් වලින්
පුදුම වී බලා උන්නා...
ඒ තමයි
මං ඈව
සිපගත්ත
මොහොත!
ඊට පස්සේ
ඝණ සැරේට
දිගටම වැස්ස...

Tuesday, February 26, 2013

ෆුකුශිමා





















සඳ රැස් ගලන රැයක
සුදු කඳු මත පතිත
හිම කැට වල පහස
ගෙනදුන්නේ නුඹයි

සකේ විතක රැඳුන
අමා මිහිරි රසය
සමඟ හදට වදින
මුදු උණුසුම නුඹයි

ගේෂාවක වයන
ෂමිසෙන් තත් අතර
දැනී නොදැනී නැගෙන
මධුර ස්වරය නුඹයි

වසන්තයට පිපෙන
සකුරා පෙති සිඹින
සුළඟ සමග එතෙන
සුමුදු සුවඳ නුඹයි

Sunday, February 10, 2013

බුබුලු නගින මී බඳුනේ




















බුබුලු නගින මී බඳුනේ
රස වෑහෙන මද පවනේ
සුදු රැස් දෙන සඳ පහනේ
හිම කැට සීතල නොදැනේ

නිල් තරු කැට දෙකක් වසා
වලා රොදක් පාව ගියා
රන් තැටියෙන් කැලුම් උරා
චෙරි මල් පෙති මෝදු වෙලා

සවන පිසින සුසුම් හඬින්
කෝල කරන හසුන් තුඩින්
නීල වනය සලා සෙමින්
කුලක් නැගුනි මලක් මතින්

සමන්පිච්ච මල් මී පැණි
වාතලයම සුවඳ දැනුනි
රන් දේදුනු සතක් නැගුනි
සඳවත ඒ මත පාවුනි

රසවැල් වල මූල් සොයලා
මිහිතල් විල කළඹවලා
කෙඳිරිල්ලට කන් තියලා
සමනැල්ලෙක් ඉගිල ගියා

පිණි පොකුරකි නලරැල්ලේ
හසුන් නිදති සැනසිල්ලේ
සුදු විල්ලුද තණනිල්ලේ
පවලම් අහුරක් දැල්ලේ

Friday, November 9, 2012

ශරත් අහස යට...




ශරත් අහසට වැද
එක එක හැඩයට පාවෙන
වලාකුළු වල
කොතැනකවත්
ඔබේ හැඩය
ඇඳිලා නෑ...

හේමන්ත නින්දට පෙර

එක එක පාටට සැරසෙන
ගස් කොළවල
කොතැනකවත්
ඔබේ පාට
තැවරී නෑ...

Saturday, January 7, 2012

කවුද ඈ?














ඈ 
තනිමග
නොරැඳෙයි
කසාදෙට පෙර
පඳුරු ගානේ
නොනිදයි
මදුවිතක් දෙසවත්
නොබලයි
මේ පිරිමි ලොව
පිරිමියට තැන දෙයි
පාසැලට සමුදෙයි
ගෙදර දොර
වැඩ 
ඉයුම් පිහුම්
මැහුම් ගෙතුම්
ටිකෙන් ටික 
හුරු වෙයි
කල වයස
පැමිණි කල
හැඩි දැඩි
හද මුදු
පිරිමියෙකු
අත පතයි
කවුද ඈ?
හෙළ බොදු
කුළ කතද?
නෑ..
සංකර
ලංඩන් පුරවර
ජිප්සි කෙල්ලක්...


Big Fat Gypsy Wedding නැමැති වාර්තා වැඩසටහන නැරඹීමෙන් පසුව ලියැවුණි.